ಬೆಳ್ತಂಗಡಿ: ನಮ್ಮ ಬೆಳ್ತಂಗಡಿ, ನಮ್ಮ ಹೆಮ್ಮೆ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳಲು ಅಸಾಧ್ಯ ಎಂಬಂತೆ ಬೆಳ್ತಂಗಡಿ ಖಾಸಗಿ ಬಸ್ ನಿಲ್ದಾಣದ ಸಮೀಪ ಮರಣಬಾವಿಯನ್ನು ನಾಚಿಸುವಂತೆ ಗುಂಡಿಗಳು ನಿರ್ಮಾಣಗೊಂಡಿದೆ.
ಬೆಳ್ತಂಗಡಿಯ ಮಾಜಿ ಶಾಸಕ ವಸಂತ ಬಂಗೇರರ ಕನಸಿನ ಕೂಸು ಬೆಳ್ತಂಗಡಿ ಖಾಸಗಿ ಬಸ್ ನಿಲ್ದಾಣ 1998ರಲ್ಲಿ ರೂಪುಗೊಂಡಿದೆ. ಈ ಹಿಂದೆ ಖಾಸಗಿ ಬಸ್ಸುಗಳು ಗುರುವಾಯನಕೆರೆಯಿಂದ ಕಾರ್ಕಳ , ಮೂಡಬಿದಿರೆ , ಉಪ್ಪಿನಂಗಡಿಗೆ ಸೀಮಿತಗೊಂಡಿತ್ತು. ಆದರೆ ಇದೀಗ ಬೆಳ್ತಂಗಡಿ ಖಾಸಗಿ ಬಸ್ ನಿಲ್ದಾಣದ ಸಮೀಪ ಮರಣಗುಂಡಿಗಳು ನಿರ್ಮಾಣಗೊಂಡು ಅಪಾಯಕ್ಕೆ ಆಹ್ವಾನ ನೀಡುತ್ತಿದೆ.
ಬಸ್ ಹೊರತುಪಡಿಸಿ ಅಪ್ಪಿತಪ್ಪಿ ದ್ವಿಚಕ್ರ , ತ್ರಿಚಕ್ರ ವಾಹನಗಳು ಈ ಗುಂಡಿಗೆ ಬಿದ್ದರೆ ಅಲ್ಲೇ ಪಲ್ಟಿ ಹೊಡೆದು ಬೀಳುತ್ತದೆ. ಈಗಾಗಲೇ ಸಾಕಷ್ಟು ಬೈಕ್ ಸವಾರರು ಈ ಮರಣಗುಂಡಿಗೆ ಬಿದ್ದು ಗಾಯ ಮಾಡಿಕೊಂಡಿದ್ದಾರೆ. ಮರಣಗುಂಡಿಯಲ್ಲಿ ಮರಣ ಸಂಭವಿಸುವ ಮೊದಲು ಈ ಗುಂಡಿಗಳನ್ನು ಮುಚ್ಚಿ ಬೆಳ್ತಂಗಡಿಯ ಘನತೆಯನ್ನು ಕಾಪಾಡಿ ಎಂದು ಸಾರ್ವಜನಿಕರು ಆಗ್ರಹಿಸುತ್ತಿದ್ದಾರೆ.
