ಗ್ರಾಮ ಪಂಚಾಯತಿ ವ್ಯಾಪ್ತಿಯಲ್ಲಿ ಸಣ್ಣ ಪ್ರಮಾಣದ ನಿವೇಶನ (ಪ್ಲಾಟ್) ಹೊಂದಿರುವ ನಾಗರಿಕರಿಗೆ ಮನೆ ನಿರ್ಮಾಣ ಮತ್ತು ಲೇಔಟ್ ಅನುಮೋದನೆ ಪ್ರಕ್ರಿಯೆಯನ್ನು ಸುಲಭಗೊಳಿಸಲು ಹಾಗೂ ವಿಳಂಬ ತಪ್ಪಿಸಲು 1ಸಾವಿರ ಚ.ಮೀ.( 0.25 ಸೆಂಟ್ಸ್) ವರೆಗಿನ ಏಕ ನಿವೇಶನ ಲೇಔಟ್ ಪ್ಲಾನ್ ಅನುಮೋದನೆಗೆ ಗ್ರಾಮ ಪಂಚಾಯತ್ಗಳ ಪಿಡಿಒಗಳಿಗೆ ಅಧಿಕಾರ ನೀಡಿ ಆದೇಶ ಹೊರಡಿಸಿರುವುದು ಗ್ರಾಮೀಣ ಜನತೆಗೆ ವರದಾನವಾಗಲಿದೆ.
ಆದೇಶದಂತೆ 1 ಸಾವಿರ ಚದರ್ ಮೀಟರ್ ಒಳಗಿನ ಏಕ ನಿವೇಶನದ ಲೇಔಟ್ ಪ್ಲಾನ್ ಅರ್ಜಿಯನ್ನು ಗ್ರಾಮದ ಪಿಡಿಒ ಅವರೇ ಪರಿಶೀಲಿಸುತ್ತಾರೆ. ಜಾಗದ ನಕ್ಷೆ, ಮಾಲೀಕತ್ವದ ದಾಖಲೆಗಳು ಮತ್ತು ಜಾಗದ ಗಡಿಗಳನ್ನು ಪಿಡಿಒ ಹಾಗೂ ತಾಂತ್ರಿಕ ಸಿಬ್ಬಂದಿ ಪರಿಶೀಲಿಸುವ
ನಿಯಮಾವಳಿಗಳಿಗೆ ಒಳಪಟ್ಟು, ಪಿಡಿಒ ಅವರೇ ಲೇಔಟ್ ಪ್ಲಾನ್ ಅನುಮೋದಿಸಿ ಈ-ಸ್ವತ್ತು ತಂತ್ರಾಂಶದ ಮೂಲಕ ಪ್ರಮಾಣಪತ್ರ ವಿತರಿಸಬಹುದು. ಇದರಿಂದ ಹಿರಿಯ ಅಧಿಕಾರಿಗಳ ಕಛೇರಿಗಳಿಗೆ ಕಡತಗಳನ್ನು ಕಳುಹಿಸುವ ಅಗತ್ಯವಿಲ್ಲದಿರುವುದರಿಂದ ಅನುಮೋದನೆ ಬೇಗನೆ ಸಿಗಲಿದೆ. ಈ ಮೂಲಕ ಮಧ್ಯವರ್ತಿಗಳ ಅನಗತ್ಯ ಹಸ್ತಕ್ಷೇಪ ತಪ್ಪಲಿದೆ. ಜೊತೆಗೆ ಸರ್ಕಾರಿ ಕಚೇರಿಗಳಿಗೆ ಅನಗತ್ಯ ಅಲೆದಾಟವೂ ತಪ್ಪಲಿದೆ.
ಇಲ್ಲಿಯವರೆಗೆ ಸಣ್ಣ ಪ್ರಮಾಣದ ಜಾಗದಲ್ಲೂ ಸಹ ಏಕ ನಿವೇಶನ ಅನುಮೋದನೆ ಪಡೆಯಲು ನಗರಾಭಿವೃದ್ಧಿ ಪ್ರಾಧಿಕಾರ, ಯೋಜನಾ ಪ್ರಾಧಿಕಾರ ಅಥವಾ ಮೂಡ ಹಂತದ ಅಧಿಕಾರಿಗಳ ಬಳಿ ಅಲೆಯಬೇಕಾಗಿತ್ತು. ಇದರಿಂದಾಗಿ ಸಮಸ್ಯೆ ಉಂಟಾಗುತ್ತಿದ್ದುದನ್ನು ಗಮನಿಸಿದ ರಾಜ್ಯ ಸರಕಾರ ಉತ್ತಮ ನಿರ್ಧಾರ ಕೈಗೊಂಡಿದೆ ಎಂದು ದ.ಕ. ಜಿಲ್ಲಾ ಕೆ.ಡಿ.ಪಿ. ಸದಸ್ಯ ಸಂತೋಷ್ ಕುಮಾರ್ ಲಾಯಿಲಾ ರಾಜ್ಯ ಸರಕಾರದ ನಿರ್ಧಾರವನ್ನು ಸ್ವಾಗತಿಸಿ, ಅಭಿನಂದಿಸಿದ್ದಾರೆ. ಅದಲ್ಲದೆ ಈ ಅನುಮೋದನೆ ಪಡೆಯಲು ಸರಕಾರ ಮಟ್ಟದಲ್ಲಿ ವಿಶೇಷ ಪ್ರಯತ್ನ ಮಾಡಿರುವ ಕೆ ಪಿ ಸಿ ಸಿ ಪ್ರಧಾನ ಕಾರ್ಯದರ್ಶಿ ಶ್ರೀ ರಕ್ಷಿತ್ ಶಿವರಾಂ ಇವರನ್ನು ಅಭಿನಂದಿಸಿರುತ್ತಾರೆ..
