ಬೆಳ್ತಂಗಡಿ : ತವಿಲ್ (ಡೊಲ್ಕಿ) ವಾದನ ಕ್ಷೇತ್ರದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ, ಮಚ್ಚಿನ ಗ್ರಾಮದ ಖ್ಯಾತ ಕಲಾವಿದ ಹೊನ್ನಪ್ಪ ದೇವಾಡಿಗ ಅವರು ಮೂರನೇ ಬಾರಿಗೆ ಅಮೆರಿಕಕ್ಕೆ ಪ್ರಯಾಣ ಬೆಳೆಸಲಿದ್ದಾರೆ.
ಕಳೆದ 35 ವರ್ಷಗಳಿಂದ ದೇಶದಾದ್ಯಂತ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ, ತಮ್ಮ ವಿಶಿಷ್ಟ ವಾದನ ಶೈಲಿಯ ಮೂಲಕ ಜನಮೆಚ್ಚುಗೆ ಗಳಿಸಿರುವ ಅವರು, ಅಮೆರಿಕದಲ್ಲಿ ನಡೆಯಲಿರುವ ‘ಶ್ರೀಮದ್ಭಗವದ್ಗೀತಾ ಯಾಗ’ ಕಾರ್ಯಕ್ರಮದಲ್ಲಿ ತವಿಲ್ ವಾದನ ಸೇವೆ ಸಲ್ಲಿಸಲಿದ್ದಾರೆ.
ಅಮೆರಿಕದ ಟೆಂಪಿ, ಫೀನಿಕ್ಸ್‌ನಲ್ಲಿರುವ ಸುಜ್ಞಾನ ರಿಲೀಜಿಯಸ್ ಆ್ಯಂಡ್ ಚಾರಿಟೇಬಲ್ ಫೌಂಡೇಶನ್‌ನ ಶ್ರೀ ವೆಂಕಟಕೃಷ್ಣ ದೇವಾಲಯದಲ್ಲಿ ಅಕ್ಟೋಬರ್ 22ರಿಂದ 24ರವರೆಗೆ ನಡೆಯಲಿರುವ ಈ ಧಾರ್ಮಿಕ ಕಾರ್ಯಕ್ರಮದಲ್ಲಿ ಸಾಂಪ್ರದಾಯಿಕ ತವಿಲ್ ವಾದನವನ್ನು ನಡೆಸಿಕೊಡಲು ಹೊನ್ನಪ್ಪ ದೇವಾಡಿಗ ಅವರಿಗೆ ಆಹ್ವಾನ ನೀಡಲಾಗಿದೆ.
ತಮ್ಮ ಕಲಾಸೇವೆಯ ಮೂಲಕ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕ್ಷೇತ್ರದಲ್ಲಿ ಗುರುತಿಸಿಕೊಂಡಿರುವ ಹೊನ್ನಪ್ಪ ದೇವಾಡಿಗ ಅವರು ಮೂರನೇ ಬಾರಿಗೆ ಅಮೆರಿಕದಲ್ಲಿ ವಾದನ ಸೇವೆ ಸಲ್ಲಿಸುತ್ತಿರುವುದು ಹೆಮ್ಮೆಯ ಸಂಗತಿಯಾಗಿದೆ.
