ವೇಣೂರು: ವೇಣೂರು-ಅಳದಂಗಡಿ ಸಂಪರ್ಕ ರಸ್ತೆಯ ಸೂಳಬೆಟ್ಟು ಎಂಬಲ್ಲಿ ರಸ್ತೆಗೆ ಅಡ್ಡವಾಗಿ ಬೃಹದಾಕಾರದ ಮರಬಿದ್ದು ಸಂಪರ್ಕ ಕಡಿತಗೊಂಡಿತು.
ಇಂದು ಬೆಳಿಗ್ಗೆ ಅದೇ ರಸ್ತೆಯಲ್ಲಿ ಬರುತ್ತಿದ್ದ ಖಾಸಗಿ ಶಾಲಾ ಬಸ್‌ ಸಂಚಾರಕ್ಕೆ ಅಡಚಣೆ ಉಂಟಾಗಿ ಶಾಲಾಮಕ್ಕಳಿಗೆ ತೊಂದರೆ ಆಗಿದೆ. ಕೆಲ ದಿನಗಳ ಹಿಂದೇ ಇದೇ ರಸ್ತೆಯಲ್ಲಿ ಮರಬಿದ್ದು ರಸ್ತೆ ಸಂಪರ್ಕ ಕಡಿತಗೊಂಡಿದ್ದಲ್ಲದೆ ವಿದ್ಯುತ್ ಕಂಬಗಳೂ ಉರುಳಿಬಿದ್ದಿದ್ದವು. ಮರ ಉರುಳಿ ಬೀಳುವ ವೇಳೆ ವಾಹನ ಸಂಚಾರ ಇಲ್ಲದೇ ಇದ್ದುದರಿಂದ ಅನಾಹುತ ನಡೆಯುವುದು ತಪ್ಪಿದೆ. ರಸ್ತೆಯುದ್ದಕ್ಕೂ ರಸ್ತೆಯ ಬದಿಗಳಲ್ಲಿ ಮರಗಳಿದ್ದು, ಇದು ಅರಣ್ಯ ಪ್ರದೇಶಗಳಿಂದ ಕೂಡಿದೆ. ಆದರೆ ರಸ್ತೆಯ ಬದಿಯಲ್ಲಿರುವ ಅಪಾಯಕಾರಿ ಮರಗಳನ್ನು ಗುರುತಿಸಿ ತೆರವುಗೊಳಿಸಬೇಕೆಂಬ ಆಗ್ರಹ ಕೇಳಿ ಬಂದಿದೆ.
