ಧರ್ಮಸ್ಥಳ: ಆಪ್ತಾಸ್ ಆಯುರ್ವೇದ ಟ್ರಸ್ಟ್ (R) ತನ್ನ 10ನೇ ವಾರ್ಷಿಕೋತ್ಸವದ ಅಂಗವಾಗಿ ಇಂದ್ರಿಯ ಆರೋಗ್ಯದ ಕುರಿತು ಪುನರ್ವಸು 2.0 – ಇಂದ್ರಿಯ ಆರೋಗ್ಯದ ಅಂತಾರಾಷ್ಟ್ರೀಯ ಸಮ್ಮೇಳನವನ್ನು ಆಯೋಜಿಸುತ್ತಿದೆ. ಆಗಸ್ಟ್ 29 ಮತ್ತು 30ರಂದು ಶ್ರೀ ಕ್ಷೇತ್ರ ಧರ್ಮಸ್ಥಳದ ಅಮೃತವರ್ಷಿಣಿ ಸಭಾಭವನದಲ್ಲಿ ನಡೆಯಲಿರುವ ಈ ಎರಡು ದಿನಗಳ ಸಮ್ಮೇಳನದಲ್ಲಿ ಆಯುರ್ವೇದ ತಜ್ಞರು, ಸಂಶೋಧಕರು, ವೈದ್ಯರು,ಶಿಕ್ಷಣ ತಜ್ಞರು, ಯುವ ವೃತ್ತಿಪರರು ಹಾಗೂ ವಿವಿಧ ಕ್ಷೇತ್ರಗಳ ಪ್ರತಿನಿಧಿಗಳು ಸಾವಿರಕ್ಕೂ ಹೆಚ್ಚು ಮಂದಿ ಭಾಗವಹಿಸಲಿದ್ದಾರೆ ಎಂದು ವೈದ್ಯ ಶರತ್ ಕುಮಾರ್ ಹೇಳಿದರು.
ಅವರು ಆ 28 ರಂದು ಬೆಳ್ತಂಗಡಿ ಪತ್ರಿಕಾ ಭವನದಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.
ಕಾರ್ಯಕ್ರಮದಲ್ಲಿ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆಯವರು, ಸಚಿವ ಯು.ಟಿ ಖಾದರ್ ಸೇರಿದಂತೆ ಸಾವಿರಾರು ವಿದ್ಯಾರ್ಥಿಗಳು, ವೈದ್ಯರು ಭಾಗವಹಿಸಲಿದ್ದಾರೆ.
ಇಂದ್ರಿಯ ಆರೋಗ್ಯವನ್ನು ದೃಷ್ಟಿ, ಶ್ರವಣ, ಘ್ರಾಣ, ರಸನೆ ಮತ್ತು ಸ್ಪರ್ಶದ ಆರೋಗ್ಯ ಹಾಗೂ ಕ್ಷೇಮವನ್ನು ಸಾರ್ವಜನಿಕ ಆರೋಗ್ಯದ ಚರ್ಚೆಯ ಭಾಗವಾಗಿಸುವುದು ಸಮ್ಮೇಳನದ ಪ್ರಮುಖ ಉದ್ದೇಶವಾಗಿದೆ. ಆರೋಗ್ಯಕರ ಜೀವನಶೈಲಿ ಮತ್ತು ಇಂದ್ರಿಯಗಳ ಜವಾಬ್ದಾರಿಯುತ ಬಳಕೆಯಲ್ಲಿ ಆಯುರ್ವೇದದ ಕೊಡುಗೆಯನ್ನು ಚರ್ಚಿಸಲು ಸಮ್ಮೇಳನ ವೇದಿಕೆಯಾಗಲಿದೆ ಎಂದರು.
ಇಂದಿನ ಜೀವನಶೈಲಿಯಲ್ಲಿ ಮೊಬೈಲ್ ಮತ್ತು ಕಂಪ್ಯೂಟರ್ ಪರದೆಗಳ ನಿರಂತರ ಬಳಕೆ, ಅತಿಯಾದ ಹೆಡ್ಫೋನ್ ಬಳಕೆ, ಅಸಮರ್ಪಕ ನಿದ್ರೆ, ಬದಲಾಗುತ್ತಿರುವ ಆಹಾರ ಪದ್ಧತಿ, ಪರಿಸರ ಮಾಲಿನ್ಯ, ಚಟುವಟಿಕೆಯ ಕೊರತೆ ಮತ್ತು ನಿರಂತರ ಡಿಜಿಟಲ್ ಪ್ರಚೋದನೆಗಳು ಇಂದ್ರಿಯಗಳ ಆರೋಗ್ಯದ ಕುರಿತು ಹೊಸ ಸವಾಲುಗಳನ್ನು ಎದುರು ನೋಡುವಂತೆ ಮಾಡಿದೆ. ಈ ಹಿನ್ನೆಲೆಯಲ್ಲಿ ರೋಗ ಕಾಣಿಸಿಕೊಂಡ ನಂತರ ಚಿಕಿತ್ಸೆಗೆ ಮಾತ್ರ ಸೀಮಿತವಾಗದೆ, ಇಂದ್ರಿಯಗಳ ಆರೋಗ್ಯವನ್ನು ಮುಂಚಿತವಾಗಿಯೇ ಕಾಪಾಡಿಕೊಳ್ಳುವ ಕುರಿತು ಹೆಚ್ಚಿನ ಜಾಗೃತಿ ಮೂಡಿಸುವ ಅಗತ್ಯವನ್ನು ಪುನರ್ವಸು 2.0 ಬಗ್ಗೆ ಹೇಳಿದರು.
ಆಯುರ್ವೇದದಲ್ಲಿ ದೃಷ್ಟಿ (ಚಕ್ಷುಸ್), ಶ್ರವಣ (ಶ್ರೋತ್ರ), ಘ್ರಾಣ (ಘ್ರಾಣ), ರಸನೆ ಮತ್ತು ಸ್ಪರ್ಶ ಇಂದ್ರಿಯಗಳಿಗೆ ಮಹತ್ವದ ಸ್ಥಾನವಿದೆ. ಮನುಷ್ಯನು ತನ್ನ ಸುತ್ತಲಿನ ಪರಿಸರದೊಂದಿಗೆ ಹೊಂದಿಕೊಳ್ಳುವಲ್ಲಿ ಹಾಗೂ ಒಟ್ಟಾರೆ ಜೀವನದ ಗುಣಮಟ್ಟದಲ್ಲಿ ಇವು ಪ್ರಮುಖ ಪಾತ್ರ ವಹಿಸುತ್ತವೆ. ದಿನಚರ್ಯೆ, ಆಹಾರ, ನಿದ್ರೆ, ಇಂದ್ರಿಯಗಳ ಸಮರ್ಪಕ ಬಳಕೆ ಮತ್ತು ಪ್ರಕೃತಿಯೊಂದಿಗೆ ಹೊಂದಾಣಿಕೆಯ ಜೀವನಶೈಲಿಗೆ ಆಯುರ್ವೇದ ನೀಡಿರುವ ಮಹತ್ವವನ್ನು ಇಂದಿನ ಸಂದರ್ಭದಲ್ಲಿ ಮತ್ತೊಮ್ಮೆ ಗಮನಕ್ಕೆ ತರುವ ಉದ್ದೇಶ ಸಮ್ಮೇಳನ ಹೊಂದಿದೆ ಎಂದರು.
ಶಾಸ್ತ್ರೀಯ ಜ್ಞಾನದಿಂದ ಕಾರ್ಯರೂಪದತ್ತ:ಪುನರ್ವಸು 2.0ರ ಪ್ರಮುಖ ಅಂಶಗಳಲ್ಲಿ ಒಂದಾಗಿರುವ “ಸಂಧಾಯ ಸಂಭಾಷೆ” ಆಯುರ್ವೇದದ ಶಾಸ್ತ್ರೀಯ ಚರ್ಚಾ ಪರಂಪರೆಯನ್ನು ಆಧರಿಸಿದೆ. ಐದು ಹಂತಗಳಲ್ಲಿ ನಡೆಯಲಿರುವ ಈ ಸಂವಾದಗಳಲ್ಲಿ “ಆಪ್ತೋಪದೇಶ, ಪ್ರತ್ಯಕ್ಷ, ಅನುಮಾನ, ಯುಕ್ತಿ ಮತ್ತು ಸಂಕಲ್ಪ” ಎಂಬ ಆಯಾಮಗಳ ಮೂಲಕ ಚರ್ಚೆ ಮುಂದುವರಿಯಲಿದೆ ಎಂದರು.
ಶಾಸ್ತ್ರೀಯ ಜ್ಞಾನದಿಂದ ಆರಂಭವಾಗಿ ವೈದ್ಯಕೀಯ ಅವಲೋಕನ, ಸಂಶೋಧನೆ ಮತ್ತು ಸಾಕ್ಷ್ಯಾಧಾರಗಳ ಪರಿಶೀಲನೆ, ಕಾರ್ಯರೂಪಕ್ಕೆ ತರುವ ವಿಧಾನಗಳು ಹಾಗೂ ಮುಂದಿನ ದಿನಗಳ ಸಾಮೂಹಿಕ ಸಂಕಲ್ಪದತ್ತ ಸಂವಾದ ಸಾಗಲಿದೆ. ಈ ಮೂಲಕ ಇಂದ್ರಿಯ ಆರೋಗ್ಯದ ಕುರಿತು ಜ್ಞಾನ, ಅನುಭವ ಮತ್ತು ಕಾರ್ಯಗತಗೊಳಿಸುವಿಕೆಯನ್ನು ಒಂದೇ ವೇದಿಕೆಯಲ್ಲಿ ತರಲು ಪ್ರಯತ್ನಿಸಲಾಗುತ್ತಿದೆ ಎಂದರು.
ಆಯುರ್ವೇದ ಯುವ ಸಮಾವೇಶ:
ಆಗಸ್ಟ್ 29ರಂದು ನಡೆಯಲಿರುವ ಆಯುರ್ವೇದ ಯುವ ಸಮಾವೇಶದಲ್ಲಿ ಯುವ ಆಯುರ್ವೇದ ವೃತ್ತಿಪರರು ಮತ್ತು ವಿದ್ಯಾರ್ಥಿಗಳಿಗೆ ವಿಶೇಷ ಸ್ಥಾನ ನೀಡಲಾಗಿದೆ. ನಾಯಕತ್ವ, ನವೀನತೆ, ಸಂಶೋಧನೆ, ಉದ್ಯಮಶೀಲತೆ, ಸಂವಹನ, ವಿವಿಧ ಕ್ಷೇತ್ರಗಳ ನಡುವಿನ ಸಹಯೋಗ ಮತ್ತು ಸಾಮಾಜಿಕ ಜವಾಬ್ದಾರಿಯ ಕುರಿತು ಚರ್ಚೆಗಳು ನಡೆಯಲಿವೆ ಎಂದರು.
ಯುವ ಆಯುರ್ವೇದ ವೃತ್ತಿಪರರು ವೈದ್ಯಕೀಯ ಸೇವೆಯ ಜೊತೆಗೆ ಸಂಶೋಧಕರು, ನವೋದ್ಯಮಿಗಳು, ಉದ್ಯಮಿಗಳು, ಸಾರ್ವಜನಿಕ ಆರೋಗ್ಯದ ಪ್ರತಿನಿಧಿಗಳು ಮತ್ತು ಭವಿಷ್ಯದ ನಾಯಕರಾಗಿ ಕೊಡುಗೆ ನೀಡುವಂತೆ ಪ್ರೇರೇಪಿಸುವುದು ಸಮಾವೇಶದ ಉದ್ದೇಶವಾಗಿದೆ ಎಂದರು.
ವಿಶ್ವದಾಖಲೆ ಪ್ರಯತ್ನ:ಆಗಸ್ಟ್ 30ರಂದು ನಡೆಯಲಿರುವ ವಿಶ್ವದಾಖಲೆ ಪ್ರಯತ್ನ ಸಮ್ಮೇಳನದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದೆ. ಆಯುರ್ವೇದದ ದಿನಚರ್ಯೆ ಆಧಾರಿತ ಇಂದ್ರಿಯ ಆರೋಗ್ಯ ಅಭ್ಯಾಸಗಳಲ್ಲಿ ಏಕಕಾಲದಲ್ಲಿ ಹೆಚ್ಚಿನ ಸಂಖ್ಯೆಯ ಜನರು ಭಾಗವಹಿಸುವ ಮೂಲಕ ಈ ಪ್ರಯತ್ನವನ್ನು ಕೈಗೊಳ್ಳಲಾಗುತ್ತಿದೆ ಎಂದರು.
ಈ ಪ್ರಯತ್ನದ ಉದ್ದೇಶ ಕೇವಲ ದಾಖಲೆ ನಿರ್ಮಿಸುವುದಲ್ಲ. ಸರಳವಾದ ಆರೋಗ್ಯಸಂರಕ್ಷಣಾ ಕ್ರಮಗಳನ್ನು ದೈನಂದಿನ ಜೀವನದ ಭಾಗವಾಗಿಸುವ ಮೂಲಕ ತಡೆಗಟ್ಟುವ ಆರೋಗ್ಯದ ಸಂದೇಶವನ್ನು ದೊಡ್ಡ ಮಟ್ಟದಲ್ಲಿ ಸಮಾಜಕ್ಕೆ ತಲುಪಿಸುವುದು ಇದರ ಆಶಯವಾಗಿದೆ ಎಂದರು.
ಸಮ್ಮೇಳನದ ಅಂಗವಾಗಿ ಇಂದ್ರಿಯ ಆರೋಗ್ಯ ಪ್ರದರ್ಶನ, ಭೇಷಜ ಮಳಿಗೆಗಳು, ವಿಶೇಷ ಕಾರ್ಯಾಗಾರಗಳು ಮತ್ತು ನೆಟ್ವರ್ಕಿಂಗ್ ಅಧಿವೇಶನಗಳುನಡೆಯಲಿವೆ. ವೈದ್ಯರು, ಸಂಶೋಧಕರು, ಶಿಕ್ಷಣ ತಜ್ಞರು, ಉದ್ಯಮ ಪ್ರತಿನಿಧಿಗಳು ಹಾಗೂ ಇತರ ವೃತ್ತಿಪರರನ್ನು ಒಂದೇ ವೇದಿಕೆಯಲ್ಲಿ ಸಂಪರ್ಕಿಸುವ ಅವಕಾಶ ಇದರಿಂದ ದೊರೆಯಲಿದೆ. ಆಯುರ್ವೇದ ಕ್ಷೇತ್ರಕ್ಕೆ ನೀಡಿದ ಗಮನಾರ್ಹ ಕೊಡುಗೆಗಳನ್ನು ಗುರುತಿಸಿ “ಪುನರ್ವಸು ಪ್ರಶಸ್ತಿಗಳು, ಯುವ ಐಕಾನ್ ಪ್ರಶಸ್ತಿಗಳು ಮತ್ತು AYURGRAMA 3.0 ಪ್ರಶಸ್ತಿಗಳು” ಸೇರಿದಂತೆ ವಿವಿಧ ಗೌರವಗಳನ್ನು ಪ್ರದಾನ ಮಾಡಲಾಗುವುದು ಎಂದರು.
ಐದು ವರ್ಷದ ರಾಷ್ಟ್ರೀಯ ಮಾರ್ಗಸೂಚಿಯತ್ತ ಹೆಜ್ಜೆ:ಪುನರ್ವಸು 2.0ರ ಉದ್ದೇಶ ಎರಡು ದಿನಗಳ ಸಮ್ಮೇಳನಕ್ಕೆ ಮಾತ್ರ ಸೀಮಿತವಾಗಿಲ್ಲ. 2026ರಿಂದ 2031ರವರೆಗೆ ಐದು ವರ್ಷದ ರಾಷ್ಟ್ರೀಯ ಇಂದ್ರಿಯ ಆರೋಗ್ಯ ಮಾರ್ಗಸೂಚಿ” ರೂಪಿಸುವ ನಿಟ್ಟಿನಲ್ಲಿ ಚಿಂತನೆ ನಡೆಸಲಾಗುವುದು. ಇದರೊಂದಿಗೆ ಧರ್ಮಸ್ಥಳ ಘೋಷಣೆ – ಇಂದ್ರಿಯ ಆರೋಗ್ಯರೂಪಿಸುವ ಆಶಯವೂ ಇದೆ ಎಂದರು
ಈ ಮಾರ್ಗಸೂಚಿಯು ಜನಜಾಗೃತಿ, ತಡೆಗಟ್ಟುವ ಇಂದ್ರಿಯ ಆರೋಗ್ಯ ಕ್ರಮಗಳು, ಸಂಶೋಧನೆ, ವೃತ್ತಿಪರ ಶಿಕ್ಷಣ, ಸಮುದಾಯ ಆಧಾರಿತ ಕಾರ್ಯಕ್ರಮಗಳು, ಯುವಜನರ ಪಾಲ್ಗೊಳ್ಳುವಿಕೆ ಮತ್ತು ವಿವಿಧ ಆರೋಗ್ಯ ಕ್ಷೇತ್ರಗಳ ನಡುವಿನ ಸಹಯೋಗಕ್ಕೆ ಮುಂದಿನ ದಿಕ್ಕು ನೀಡುವ ಉದ್ದೇಶ ಹೊಂದಿದೆ ಎಂದರು.
ಆಪ್ತಾಸ್ ಆಯುರ್ವೇದ ಟ್ರಸ್ಟ್ ತನ್ನ ದಶಮಾನೋತ್ಸವವನ್ನು ಆಚರಿಸುತ್ತಿರುವ ಸಂದರ್ಭದಲ್ಲಿ ನಡೆಯುತ್ತಿರುವ ಪುನರ್ವಸು 2.0, ಕಳೆದ ಹತ್ತು ವರ್ಷಗಳ ಪಯಣವನ್ನು ಸ್ಮರಿಸುವುದರ ಜೊತೆಗೆ ಮುಂದಿನ ವರ್ಷಗಳಿಗಾಗಿ ಹೊಸ ದಿಕ್ಕನ್ನು ರೂಪಿಸುವ ಪ್ರಯತ್ನವಾಗಿದೆ. ಎರಡು ದಿನಗಳ ಕಾರ್ಯಕ್ರಮವನ್ನು ಮೀರಿ, ಇಂದ್ರಿಯ ಆರೋಗ್ಯವನ್ನು ತಡೆಗಟ್ಟುವ ಆರೋಗ್ಯದ ಪ್ರಮುಖ ಭಾಗವನ್ನಾಗಿ ಮಾಡುವ ನಿರಂತರ ಚಿಂತನೆ ಮತ್ತು ಕಾರ್ಯಚಟುವಟಿಕೆಗೆ ಇದು ಆರಂಭವಾಗಲಿದೆ ಎಂದರು.
ಹಿಂದಿನ ಜ್ಞಾನದಿಂದ ಭವಿಷ್ಯದ ಆರೋಗ್ಯದ ಅಗತ್ಯಗಳತ್ತ” ಸಾಗುವ ಪುನರ್ವಸು 2.0, ಇಂದ್ರಿಯ ಆರೋಗ್ಯವನ್ನು ಪ್ರತಿಯೊಬ್ಬರ ಗಮನಕ್ಕೆ ತರುವ ಮತ್ತು ಆರೋಗ್ಯಸಂರಕ್ಷಣೆಯನ್ನು ಸಾಮೂಹಿಕ ಜವಾಬ್ದಾರಿಯನ್ನಾಗಿ ಮಾಡುವ ಉದ್ದೇಶ ಹೊಂದಿದೆ ಎಂದರು.
ಪತ್ರಿಕಾಗೋಷ್ಠಿಯಲ್ಲಿ ಡಾ. ಮಂಜುನಾಥ್, ಡಾ.ಸಂಗೀತಾ, ಡಾಅನುಪಮಾ ಉಪಸ್ಥಿತರಿದ್ದರು.
