ಉಜಿರೆ: ಇಂದಿನ ಯುವಜನತೆ ದುಶ್ಚಟಗಳಿಗೆ ಬಲಿಯಾಗದೆ, ಜೀವನದಲ್ಲಿ ಶಿಸ್ತು, ಸಮಯ ಪ್ರಜ್ಞೆ ಮತ್ತು ಸ್ಪಷ್ಟವಾದ ಗುರಿಯನ್ನು ಇಟ್ಟುಕೊಂಡರೆ ಮಾತ್ರ ಉತ್ತಮ ಭವಿಷ್ಯ ಕಟ್ಟಿಕೊಳ್ಳಲು ಸಾಧ್ಯ ಎಂದು ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕಾಲೇಜು (ಸ್ವಾಯತ್ತ), ಉಜಿರೆಯ ನಿವೃತ್ತ ಪ್ರಾಂಶುಪಾಲರಾದ ಡಾ. ಎ. ಜಯಕುಮಾರ್ ಶೆಟ್ಟಿ ಹೇಳಿದರು.
ರುಡ್ಸೆಟ್ ಸಂಸ್ಥೆ, ಸಿದ್ಧವನ, ಉಜಿರೆ ವತಿಯಿಂದ ಆಯೋಜಿಸಲಾಗಿದ್ದ ಸೆಲ್ಫೋನ್ ರಿಪೇರಿ ಮತ್ತು ದುರಸ್ತಿ ತರಬೇತಿ ಕಾರ್ಯಕ್ರಮದ ಸಮಾರೋಪ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿ, ಶಿಬಿರಾರ್ಥಿಗಳಿಗೆ ಸಮಾರಂಭದಲ್ಲಿ ಪ್ರಮಾಣಪತ್ರಗಳನ್ನು ವಿತರಿಸಿ, ಅವರು ಮಾತನಾಡಿದರು.
“ಸಾಮಾನ್ಯವಾಗಿ ಕೆಲಸ ಮಾಡುವುದಕ್ಕಿಂತ, ಅಸಾಮಾನ್ಯ ಗುಣಮಟ್ಟದ ಕೆಲಸ ಮಾಡುವ ಗುರಿ ಇಟ್ಟುಕೊಳ್ಳಬೇಕು. ಒಂದು ಮೊಬೈಲ್ ದುರಸ್ತಿ ಮಾಡುವಾಗ ಕೇವಲ ಹಣ ಗಳಿಸುವ ಉದ್ದೇಶವಲ್ಲದೆ, ಗ್ರಾಹಕರ ನಂಬಿಕೆಯನ್ನು ಗಳಿಸುವ ಉದ್ದೇಶವೂ ಇರಬೇಕು. ನಂಬಿಕೆ ಗಳಿಸಿದ ಉದ್ಯಮಕ್ಕೆ ಗ್ರಾಹಕರು ತಾವಾಗಿಯೇ ಬರುತ್ತಾರೆ” ಎಂದು ಅವರು ಹೇಳಿದರು.
ಇಂದಿನ ದಿನಗಳಲ್ಲಿ ಮೊಬೈಲ್ ಫೋನ್ ಕೇವಲ ಸಂವಹನದ ಸಾಧನವಲ್ಲದೆ, ಶಿಕ್ಷಣ, ವ್ಯಾಪಾರ, ಬ್ಯಾಂಕಿಂಗ್, ಉದ್ಯೋಗ ಮತ್ತು ಮನರಂಜನೆಯ ಪ್ರಮುಖ ಸಾಧನವಾಗಿದೆ. ಹೀಗಾಗಿ ಮೊಬೈಲ್ ದುರಸ್ತಿ ಕ್ಷೇತ್ರದಲ್ಲಿ ನಿರಂತರ ಬೇಡಿಕೆ ಇರುತ್ತದೆ. ಆದರೆ ತಂತ್ರಜ್ಞಾನ ವೇಗವಾಗಿ ಬದಲಾಗುತ್ತಿರುವುದರಿಂದ ತರಬೇತಿ ಪಡೆದವರು ಹೊಸ ಮಾದರಿಯ ಮೊಬೈಲ್ಗಳು, ಸಾಫ್ಟ್ವೇರ್, ಹಾರ್ಡ್ವೇರ್ ಹಾಗೂ ದುರಸ್ತಿ ತಂತ್ರಜ್ಞಾನಗಳ ಕುರಿತು ನಿರಂತರವಾಗಿ ಕಲಿಯಬೇಕು ಎಂದು ಸಲಹೆ ನೀಡಿದರು.
“ತರಬೇತಿ ಮುಗಿದಿದೆ ಎಂದರೆ ಕಲಿಕೆ ಮುಗಿದಿದೆ ಎಂದಲ್ಲ. ಇಂದಿನಿಂದ ನಿಮ್ಮ ನಿಜವಾದ ಪರೀಕ್ಷೆ ಆರಂಭವಾಗುತ್ತದೆ. ನೀವು ಕಲಿತ ಕೌಶಲ್ಯವನ್ನು ಬದುಕಿನಲ್ಲಿ ಬಳಸಿಕೊಂಡು ಆದಾಯ ಗಳಿಸಿದಾಗ ಮಾತ್ರ ತರಬೇತಿಗೆ ನಿಜವಾದ ಅರ್ಥ ಬರುತ್ತದೆ” ಎಂದು ಅವರು ಶಿಬಿರಾರ್ಥಿಗಳಿಗೆ ಪ್ರೇರಣೆ ನೀಡಿದರು.
ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದ ರುಡ್ಸೆಟ್ ಸಂಸ್ಥೆಗಳ ಕಾರ್ಯನಿರ್ವಾಹಕ ನಿರ್ದೇಶಕರಾದ ಬಿ.ಪಿ. ವಿಜಯ್ ಕುಮಾರ್ ಮಾತನಾಡಿ, ತರಬೇತಿ ಪಡೆದವರು ತಮ್ಮ ಕೌಶಲ್ಯವನ್ನು ಸ್ವಉದ್ಯೋಗವಾಗಿ ಪರಿವರ್ತಿಸಿಕೊಳ್ಳಬೇಕು ಎಂದು ಕರೆ ನೀಡಿದರು.
“ಸ್ವಂತ ಬಂಡವಾಳ ಕಡಿಮೆ ಇದೆ ಎಂಬ ಕಾರಣಕ್ಕೆ ಉದ್ಯಮದ ಕನಸನ್ನು ಕೈಬಿಡಬೇಡಿ. ನಿಮ್ಮಲ್ಲಿ ಕೌಶಲ್ಯ, ಪರಿಶ್ರಮ ಮತ್ತು ಉತ್ತಮ ವ್ಯವಹಾರ ಕಲ್ಪನೆ ಇದ್ದರೆ ಬ್ಯಾಂಕ್ ಸಾಲದ ನೆರವಿನಿಂದಲೂ ಉದ್ಯಮ ಆರಂಭಿಸಬಹುದು. ಬ್ಯಾಂಕ್ನಿಂದ ಸಾಲ ಪಡೆಯುವುದು ತಪ್ಪಲ್ಲ; ಪಡೆದ ಸಾಲವನ್ನು ಸರಿಯಾದ ವ್ಯವಹಾರದಲ್ಲಿ ಬಳಸದೆ ಇರುವುದು ತಪ್ಪು” ಎಂದು ಅವರು ಹೇಳಿದರು.
ಮೊಬೈಲ್ ರಿಪೇರಿ ಅಂಗಡಿ ಆರಂಭಿಸಲು ಅಗತ್ಯವಾದ ಉಪಕರಣಗಳನ್ನು ಹಂತ ಹಂತವಾಗಿ ಖರೀದಿಸಬಹುದು. ಆರಂಭದಲ್ಲಿ ಸಣ್ಣ ಪ್ರಮಾಣದಲ್ಲಿ ಸೇವೆ ನೀಡುತ್ತಾ, ಗ್ರಾಹಕರ ನಂಬಿಕೆ ಗಳಿಸಿದ ನಂತರ ವ್ಯವಹಾರವನ್ನು ವಿಸ್ತರಿಸಬಹುದು. ಬ್ಯಾಂಕ್ ಸಾಲ ಪಡೆದು ಉಪಕರಣಗಳನ್ನು ಖರೀದಿಸಿ, ಪ್ರಾಮಾಣಿಕವಾಗಿ ವ್ಯವಹಾರ ನಡೆಸಿ, ಸಮಯಕ್ಕೆ ಸಾಲ ಮರುಪಾವತಿ ಮಾಡುವ ಮೂಲಕ ಉತ್ತಮ ಉದ್ಯಮಿಯಾಗಿ ಬೆಳೆಯಬೇಕು ಎಂದು ತಿಳಿಸಿದರು.
ಮೊಬೈಲ್ ದುರಸ್ತಿ ಜೊತೆಗೆ ಮೊಬೈಲ್ ಆಕ್ಸೆಸರೀಸ್ ಮಾರಾಟ, ಸಾಫ್ಟ್ವೇರ್ ಸೇವೆ, ಡೇಟಾ ವರ್ಗಾವಣೆ, ಸ್ಕ್ರೀನ್ ಮತ್ತು ಬ್ಯಾಟರಿ ಬದಲಾವಣೆ, ಮೊಬೈಲ್ ಸಾಫ್ಟ್ವೇರ್ ಅಪ್ಡೇಟ್ ಹಾಗೂ ಇತರೆ ಡಿಜಿಟಲ್ ಸೇವೆಗಳನ್ನು ಒದಗಿಸುವ ಮೂಲಕ ಆದಾಯದ ಅವಕಾಶಗಳನ್ನು ಹೆಚ್ಚಿಸಿಕೊಳ್ಳಬಹುದು ಎಂದರು.
“ಪ್ರಮಾಣಪತ್ರವನ್ನು ಗೋಡೆಯ ಮೇಲೆ ಹಾಕುವುದಕ್ಕಿಂತ, ಅದರಿಂದ ನಿಮ್ಮ ಜೀವನದಲ್ಲಿ ಬದಲಾವಣೆ ತರಬೇಕು. ತರಬೇತಿಯ ಕೊನೆಯ ದಿನ ನಿಮ್ಮ ಉದ್ಯೋಗ ಹುಡುಕಾಟದ ಅಂತ್ಯವಾಗಬಾರದು; ನಿಮ್ಮ ಸ್ವಉದ್ಯೋಗದ ಮೊದಲ ದಿನವಾಗಬೇಕು” ಎಂದು ಬಿ.ಪಿ. ವಿಜಯ್ ಕುಮಾರ್ ಹೇಳಿದರು.
ರುಡ್ಸೆಟ್ ಸಂಸ್ಥೆ, ಉಜಿರೆಯ ನಿರ್ದೇಶಕರಾದ ಸುನೀಲ್ ಜಿ. ನಾಯಕ್ ಸ್ವಾಗತಿಸಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಶಿಬಿರಾರ್ಥಿಗಳಾದ ರಾಮಕೃಷ್ಣ ಹಾಗೂ ಆಶ್ರಯ ತಮ್ಮ ತರಬೇತಿ ಅನುಭವಗಳನ್ನು ಹಂಚಿಕೊಂಡರು. ಶ್ರೀಮತಿ ಶ್ವೇತಾ ಪ್ರಾರ್ಥಿಸಿದರು , ಹಿರಿಯ ಉಪನ್ಯಾಸಕರಾದ ಕರುಣಾಕರ ಜೈನ್ ಧನ್ಯವಾದ ಸಮರ್ಪಿಸಿದರು. ಹಿರಿಯ ಉಪನ್ಯಾಸಕರಾದ ಅಬ್ರಹಾಂ ಜೇಮ್ಸ್ ಕಾರ್ಯಕ್ರಮ ನಿರೂಪಿಸಿದರು.
