ನೆಲ್ಯಾಡಿ: ಇಲ್ಲಿನ ಗಾಂಧಿ ಮೈದಾನದಲ್ಲಿ ಸೆಂಟ್ ಅಲ್ಫೋನ್ಸಾ ಎಸ್.ಎಂ.ವೈ.ಎಮ್. (SMYM) ನೇತೃತ್ವದಲ್ಲಿ ನಡೆದ ‘ಅಲ್ಫಾ ಪ್ರಿಮಿಯರ್ ಲೀಗ್’ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಬಿಳಿನೆಲೆ ಬ್ಲಾಸ್ಟರ್ಸ್ ತಂಡವು ರೋಚಕ ಜಯ ಸಾಧಿಸಿ ಚಾಂಪಿಯನ್ ಪಟ್ಟಕ್ಕೇರಿದೆ.
ಒಟ್ಟು 11 ತಂಡಗಳು ಭಾಗವಹಿಸಿದ್ದ ಈ ಕೂಟದ ಫೈನಲ್ ಹಣಾಹಣಿಯಲ್ಲಿ ಮಂಗಳೂರು ಅದ್ವೈಕ್ ತಂಡದ ವಿರುದ್ಧ ಸೆಣಸಿದ ಬಿಳಿನೆಲೆ ಬ್ಲಾಸ್ಟರ್ಸ್, ಅತ್ಯಂತ ಕುತೂಹಲಕಾರಿಯಾಗಿ ನಡೆದ ಸೂಪರ್ ಓವರ್‌ನಲ್ಲಿ ಎದುರಾಳಿಯನ್ನು ಪರಾಭವಗೊಳಿಸಿ ಟ್ರೋಫಿಯನ್ನು ತನ್ನದಾಗಿಸಿಕೊಂಡಿತು.
ಸಾಮಾಜಿಕ ಕಳಕಳಿ:
ಕೇವಲ ಪಂದ್ಯಾಟಕ್ಕಷ್ಟೇ ಸೀಮಿತವಾಗದೆ, ‘ಕ್ಯಾನ್ಸರ್ ಕೇರ್’ ಯೋಜನೆಯಡಿ ಅಸಹಾಯಕ ಕ್ಯಾನ್ಸರ್ ರೋಗಿಗಳಿಗೆ ಆರ್ಥಿಕ ನೆರವು ನೀಡುವ ಸದುದ್ದೇಶದಿಂದ ಎಸ್.ಎಂ.ವೈ.ಎಮ್. ಈ ಸಮಾಜಮುಖಿ ಕ್ರಿಕೆಟ್ ಕೂಟವನ್ನು ಆಯೋಜಿಸಿ ಸಾರ್ವಜನಿಕರ ಮೆಚ್ಚುಗೆಗೆ ಪಾತ್ರವಾಗಿದೆ.
ಬೆಳ್ತಂಗಡಿಯ ‘ಕಲ್ಪತರು ಸ್ಕೂಲ್ ಆಫ್ ಎಜುಕೇಶನ್ ಟ್ರಸ್ಟ್ ಪಂದ್ಯಾವಳಿಯ ಪ್ರಥಮ ಬಹುಮಾನ ರೂ. 25,000/- ವನ್ನು ಕೊಟ್ಟು ಸಹಕರಿಸಿದರು. ಎಸ್ ಎಂ ವೈ ಎಂ ಯುವಕರ ಸಾಮಾಜಿಕ ಬದ್ಧತೆಯನ್ನು ವಂದನಿಯ ಫಾ. ಷಾಜಿ ಮಾತ್ಯು ಅಭಿನಂದಿಸಿದರು.
